എൻറെ സ്നേഹത്തെക്കുറിച്ച്

എൻറെ സ്നേഹം മഴപോലെയാണ്...

ഒരിക്കൽ
വേനൽ കത്തിയെരിയുന്ന നട്ടുച്ചയിൽ
അതൊരു ചാറ്റൽമഴയായി പെയ്തേക്കാം
ദാഹിച്ചുവലഞ്ഞ നിൻറെ ചുണ്ടുകൾക്ക്
അതൊരാശ്വാസമായേക്കാം
നിൻറെ വരണ്ടുണങ്ങിയ മരുഭൂമികളിൽ
വീണ്ടും പുൽനാമ്പ് പൊട്ടി മുളച്ചേക്കാം...

പിന്നീട്
വിയർത്തൊഴുകുന്ന ഉഷ്ണയാമങ്ങളിൽ
അതൊരു രാത്രിമഴയായേക്കാം
എൻറെ പ്രേമത്തിൻറെ തണുപ്പിൽ
നീ സുഖമായുറങ്ങിയേക്കാം
ആ മയക്കത്തിലെവിടെയോ
മധുരിക്കുന്ന സ്വപ്‌നങ്ങൾ കണ്ട് നീ ചിരിച്ചേക്കാം...

പിന്നീടൊരിക്കലൊരു പുതുമഴയിൽ
നിൻറെ മേൽക്കൂര ചൊർന്നൊലിച്ചേക്കാം 
നീ ജലദോഷപ്പനിപിടിച്ച് കിടപ്പിലായേക്കാം
കയ്പ്പുള്ള മരുന്ന് കണ്ണടച്ചിറക്കാൻ
നീയേറെ കഷ്ട്ടപ്പെട്ടേക്കാം... 

ഒടുവിലെന്റെ സ്നേഹം
നിൻറെ ഭൂമിയിൽ പ്രളയം സൃഷ്ടിച്ചേക്കാം
പെരുമഴയിൽ നിൻറെ കണ്ണീരിന്
തനിമ നഷ്ടപ്പെട്ടേക്കാം
കാലിനടിയിലെ മണ്ണുമൊലിച്ചിറങ്ങുമ്പോൾ
നീയൊരു ഭ്രാന്തിയേപ്പോലെയലറിയേക്കാം...

പിന്നേയും ഞാൻനിന്നെ സ്നേഹിക്കും 
കാരണം,
എൻറെ സ്‌നേഹം തോരാത്ത മഴപോലെയാണ്‌...