മുറിവ്

നിന്റെ പല്ലുകൊണ്ട്
എന്റെ ചുണ്ടിലേറ്റ  മുറിവിന് 
മരുന്നുതേടി ഞാനലയുന്നതെവിടെ???
ഈ മുറിവിനുള്ള മരുന്ന്
നിന്റെ ചുംബനങ്ങൾ തന്നെയെന്ന് 
ഞാൻ തിരിച്ചറിയാഞ്ഞതെന്തേ???

വാക്കുകൾ  കൊണ്ട്
മരുന്നില്ലാത്ത മുറിവുകൾ
നിന്റെ നെഞ്ചിൽ കോറിവരക്കുമ്പോഴും,
വെറുപ്പിന്റെ മുനയിൽ കോപം പുരട്ടി
അതിടക്കിടെ കുത്തിയിളക്കുമ്പോഴും
നീ പുഞ്ചിരിച്ചു കൊണ്ടിരുന്നു;
മുറിവില്ലാത്തോരിടവും നിന്നിൽ
ബാക്കിയില്ലാതാകും വരെ...

ഞാൻ
ഇന്നീ ദിക്കറിയാ ദുഖ:ഭൂമിയിൽ 
ചോരയൊലിക്കുന്ന ചുണ്ടുകളുമായി
നിന്നെ തേടിയലയുന്നു...
നീയോ
വരണ്ട വേദനയുടെ മണ്‍പാതയിലൂടെ
കാല്പാടുകൾ പോലും പതിപ്പിക്കാതെ
നടന്നകന്നുകഴിഞ്ഞു.....

ഇന്നെന്റെ മനസ്സിൽ ചിതറിക്കിടക്കുന്ന
നിന്റെ ഓർമകളുടെ കരിയിലകൾക്ക്
ഞാനിനിയും തീ കൊടുത്തിട്ടില്ല...
അതിനുമീതെ ഉറക്കം മറന്ന രാത്രികളിൽ
ശബ്ദമുണ്ടാക്കി  നടക്കുന്നതാണ്
ഇപ്പോഴീ  വേദനയ്ക്കൊരാശ്വാസം...